Vanoavond stoa ik hier veur oe,
Deurluchtige hoogheden en oe gevolg
As n’n halven siepel
En doo ‘t woord in’t plat.
Ik hop da’j mie good verstoat
Veur da’w van hier wieder goat
Want vanoavond bint wie efkes stil
Dat geet nich altied noar ieders wil
M’r t’ís ja carnaval
En dat gif ja heel wat te doon
De leu bint ja kats op’n biester
en daanst van hen en weer
Nich alleen oonder de grote rivieren
Könt ze carnaval vieren
Joa in oons Twentse laand
Viert wie het ok, haand in haand
De klokk’n luudt noe veur oe, leu
Zee beiert hoog in Denn’n kaamps toor’n,
Zee roopt oe allmoal noar ‘n doarp,
Met n‘n klaank dee van wieten te heuren is
Dinkellaand dompelt zich in ’t carnaval
En veult zich efkes nen toffen peer
Joa, wie goat oet oons’n bol,
En daanst oons daag’n lang helemoal dol
Oonse hoogheden maakt noe de deenst oet,
Met op ’n kop ne steek met veer’n
Van oons burgervaa kriegt ze voart ’n sleuttel
Zee spölt d’r met, nee ’t is gen’n pröttel
De Droadneggel, Schuppendrieters en de Waterpönskes,
de Köttelpeer’n, Nachtuulkes, de Greune Köttelpeerkes,
en niet te vergeten Casanova en de Köttelvretters,
maakt dizze dagen de deenst oet.
Met op de zittingsoavonden
De buuts, muziek,
met hun grappen en grollen
hebt zee oe vermaakt, zee wann’n ja geeels nich te holl’n.
De prins, groaf, hertoog, markies, joonker en hun adjudanten,
zee zorgt veur bliedschop en vetier
Op de gala’s in oonse doarpen
’t Was feest, töt in de kleene uuren
Prins Dennis, met ziene sik Barry van de Köttelpeern,
Joa dat bint wal veurname heer’n
Zee goat veurop hier in’n doarp
M’r zee hebt ok heel wat concurrentie.
Joa, van de Nachtuulkes met hertog Jop en sik Tom
Dee hebt vestaand van ett’n en auto’s oplaad’n
Dat is gen kattepis in deeze daag’n
Ie zölt m’r hoonger kriegen, of nog slimmer
Met ’n auto van de weg of veuren in ’n sloot.
Dan zit ie met dizze twee d’r heel woarm bie.
Groaf Giel, groavin Lindsey en sik Stef van Cassanova,
Spölt dit joar weer ‘n trio op hun sofa.
Zee maakt d’r ’n onmeunig feest van
En loat ’n doap trill’n op heur veste.
Groot Hertog Mike met zien’n sik Roy,
Twee breurs dee an’t bewind bint in Waterpönskes doarp,
Zee hebt al ‘n onmeunig mooi jubileum viert
Joa, zee bint ok good in ’t heisen,
of ’t bier is of op ’n bouw,
Loat ze m’r loop’n,
’t koomp harstikke good.
Jonker Naud en sik Jorén van de Greunen,
Wilt wie hier ok met alle eer neumen.
Met oetbundige grollen stoat ze kloar
En trekt zee bie de Greunen dit joar de koar.
En dan Markies Rob, ’n tweede met sik Paul,
Dee zwaait bie de droadneggel en de Schuppendrieters
Van greun weet zij alles, en aans wa van managen,
Doar zit wa muziek in en ok wa ’s luk sportiviteit
Met hun kielzog de Opper Köttel en Kniepköttel,
Dee jonge leu oet Lattrop en Breklenkaap
Anvoert deur Opperköttel Kjell en Kniepköttel Niels
Dat wödt ’n onmeinig mooi feest, doar an de grèèns.
M’r ok de prinsenkeender van de scholen,
Joa, de klassen stoat efkes op ’n kop
Zee viert ’t carnaval
In nen nöttenndop.
Oonderwiezers vanAlexander, Willibrord, King en Veldkaamp,
Rekk’n en taal, dat wördt ‘n raamp.
Belast de keender doar nich met,
Gef ze leefer völl wil en plezeer
Maak oe nich zo drok veur monn,
zegt ’t ewangellie oons vandaag,
prakkezeer doar nich alverdan oawer,
want d’r is mear in ’t leaven.
’t Leaven is meer weerd as etten
En ‘t lief meer as oe kleer,
Kiek toch es noar de vöggel
Zeaien en meaiwen doot zee nich.
Nen kealder of spieker bint ze geels nich neudig.
Ie bint toch völl mear as dee vöggel?
Met al dat prakkezeern,
Kom ie nich wieder
en köj ’t leaven nicht grötter maak’n
Maak oe dan ok nich zo drok
oawer waj ett’n of dreek’n zölt,
dat bint dinge woar de leu
van de weareld zich drok um maakt.
Oons Va in’hemmel wet wa waj neudig bint
Maak oe lever eerst drok oawer God Zien Riek,
dan krieg ie alle aandere dinge doar allmoal bie.
Loat dat de bosschop veur oons ween
Joa , ok voort met ’t carnaval,
En oak noa Asschegoonsdag in de Vastentied.
De tied van inkeer en boot.
M’r earst komp ‘n Vasseloavond,
En stekt wie de lechtkes an in’köttelpeernboam
As symbool van feest en plezeer
Hier in’doarp en ummelaand.
Met oawer ’n wek de optochten
Waag’ns van creativiteit en plezeer
An de confetti, slingers en ballonnen
Zeet wie dat ’t feest is begunnen.
Leu, loaw ‘t beste masker opzett’n
En ’t strakke gezicht vergett’n
Maak plezeer veur twee
Goat tehoop en daans gedwee.
M’r noa dree daag’n is ’t gebeurd
Doar wödt dan nich mer oawer treurt.
Dan is ’t Asschegoonsdag
En verwocht wie oe hier wear in de keark
Want de assche mot wödd’n streujt,
Oawer oonse hood hen, zodat wie het allmoal veult.
Want allmoal bint wie van stof
En oeteindelijk wödt wie eens wear tot stof.
M’r dizze daag’n gunt wie oe earst plezear
Geniet van ’n gleaske vol met bier
En bedeank: ’n hemmel waakt oawer oons
Zee döt dizze daag’n, wal een eugke too.
Loat noe m’r klinken driemoal: alaaf!
Denekamp 3 februari 2024, Pastor Jan Kerkhof Jonkman